Cincuenta anos dan para moito. Para momentos bos, incluso gloriosos, para anécdotas divertidas e outras embarazosas, para forxar boas amizades,… pero tamén para momentos difíciles, problemas económicos, enfrontamentos, incertidume… Cincuenta son os anos que cumpría o ano pasado o Centro de Deportes Barco, cinco décadas nas que o equipo de fútbol amparado polo club sufríu numerosos altibaixos tanto deportivos como persoais, con centos de xogadores, miles de euros de presuposto, innumerables e irrepetibles historias e máis de dez directivas e xestoras.
E entre esas directivas que formaron parte da historia do mítico club vermello está a presidida por Daniel Ramos, Nilo, que esta semana cumpre vinte anos á fronte, primeiro como parte dunha xunta xestora e logo xa como presidente. Dúas décadas nas que o equipo pasou por todas as categorías ata Terceira División onde militou varios anos, rozando o ascenso a Segunda B.
Logo de dúas tempadas complicadas, o 1 de agosto comezará a pretempada en Preferente, co firme propósito de volver a ascender o antes posible.
