Sen positivos en coronavirus no cribado que se lle realizaba na ponte do 12 de outubro aos comerciantes da Praza de Abastos Nº1 de Ourense. Así o confirman dende esta praza, que agradece tanto ao Sergas como ao xerente da Área sanitaria de Ourense, “a rapidez e profesionalidade para levar a cabo as probas. Así mesmo tamén se quere recoñecer desde a praza o labor de sanitarios e persoal sanitario en xeral o seu bo trato e traballo”.
Esta medida enmárcase dentro doutras máis amplas, que se tomaron para garantir que o mercado “sexa un espazo seguro, como poden ser o control de aforos, distancias, colocación de xeles hidroalcohólicos, ventilación constante, e renovación forzada do aire exterior cada 45 minutos ou a potenciación do servizo a domicilio”, tal e como explican dende a Praza de Abastos Nº1.
Sinalan tamén que, “tanto comerciantes como clientes valoraron moi positivamente estas accións, e seguirán traballando a futuro para adoptar todas aquelas medidas que garantan unha contorna segura”.
Así mesmo o colectivo fai un chamamento a “non baixar a garda ante o virus, e seguir extremando as medidas de seguridade tanto praceiros, como clientes”.