A Casa da Cultura acollía na mañá do domingo 10 de maio, a presentación da candidatura do BNG da Rúa, nun acto público aberto que contou coa presenza de Xosé Lois “O Carrabouxo” chegado dende Ourense.
Encabezada pola candidata á alcaldía, María González Albert, a lista do Bloque Nacionalista Galego da Rúa conta con Avelino Fernández como número 2 e Germán Alejandre Salgado como número 3, todos presentes no acto. Completan a lista Patricia Rodríguez Núñez (4); Manuel Ángel Durán Blanco (5); Xiana Rivera Guerra; Roberto Quiroga López; María Cristina Vicente Fernández; Xosé Manoel Mateo Cao; María Nogueira Díaz; e Magín Blanco García.
O primeiro en intervir no acto foi Avelino asegurando que “nós estamos para demostrar que aquí hai xuventude, sana e libre” facendo referencia á candidatura nacionalista formada por xente nova que “ante todo ten dignidade, que quere gobernar o seu futuro e a maneira de facelo é enfrontarse a todo este caciquismo que nos está a gobernar na Rúa”. O número tres asegurou que “ante esas políticas de compadreo estamos nós, para demostrarlle á xente que hai outra forma de gobernar. Hai que gobernar para os veciños e contar cos barrios non só cando hai festas” concluíndo a súa intervención asegurando que “isto non pode seguir así”.
Co seu característico humor intervíu Xosé Lois, seguido por Germán Alejandre e a candidata á alcaldía, María Albert que falou dos principais puntos do programa co que concorren ás eleccións municipais, como “a recuperación de servizos públicos, o asociacionismo e a mocidade, ou reverter a decadencia en materia de urbanismo” entre outros.
Fotos: Mónica G. Bellver