A tradición do Entrudio de Viana do Bolo dábase a coñecer na pasada fin de semana na illa de Sardeña (Italia). O Fulión e os Boteiros participaban nun desfile de mascaradas tradicionais que se celebraba o 4 de xuño co gallo do 20 aniversario do Museo delle Maschere Mediterranee (MaMu – Museo delle Maschere, Museo della Cultura e del Lavoro, MATer) en Mamoiada.
As vianesas eran as únicas máscaras da Península Ibérica presentes neste evento, no que percorrían as rúas xunto a figuras como os Tamburini e Trombettieri de (Oristano – Sardeña), os Mamuthones e Issohadores (Mamoiada – Sardeña), os Thurpos (Orotelli – Sardeña), os Rollate (Sappada – Friuli-Venecia Giulia), Lastarii (Bucovina – Romanía/Ucraína) e os Grobnicki (Grobnik – Croacia).
Pero ademais do desfile, a representación do Entrudio vianés participaba noutros actos. Así presentábase a máscara do Boteiro e cedíase un traxe desta máscara á Associazione Pro Loco de Mamoiada co obxectivo de que quede exposta Museo delle Maschere Mediterranee. Neste museo xa había un traxe de Boteiro de Vilariño e outro da Pantalla de Xinzo, así como unha careta de Peliqueiro.
Nesta viaxe a Sardeña os membros do Fulión vianés estiveron acompañados polo alcalde en funcións de Viana, Andrés Montesinos. Ademais eran agasallados polos organizadores do evento cunha careta de Mamuthone.
Fotos cedidas e de Luciano Solero.
