Unha vitoria máis, e xa van catro consecutivas, conseguía o C.D. Barco na tarde do 6 de outubro no campo de Calabagueiros ante o Club Rápido de Bouzas.
Ás cinco e media da tarde e un domingo máis diante dun bo número de afeccionados, o conxunto vermello saltaba ao campo disposto a sumar os tres puntos en xogo, diante dun Rápido de Bouzas que non lle puxo as cousas fáciles. Aínda así eran os locais os que se adiantaban no marcador grazas ao gol de Íñigo Pisón no minuto 9 do encontro rematando a primeira parte co 1-0 no marcador. Tras varios intentos fallidos, non sería ata o minuto 69, xa na segunda metade, cando Juanito Bazo poñía o 2-0, sendo no 90′ cando Tape marcaba para os pontevedreses, un conxunto que conta nas súas filas cun ex xogador barquense (Edu Otero) quen fichara polo Barco na última campaña de Javi Rey aínda que tivo que deixar o equipo.
Co 2-1 no marcador o Barco mantense no alto da clasificación en terceira división, en postos de promoción, á espera da vindeira xornada que levará aos rapaces de Manolo Pérez ata o campo da Cheda, en Lugo, para xogar contra o Polvorín FC.
Fotos: Mónica G. Bellver
