Invocado entre outras cousas para atopar obxectos perdidos, San Antonio de Padua é un dos santos máis venerados, de feito só en Valdeorras hai varias localidades que lle renden culto. O sábado facíano en Sobradelo, esta mañá en Riomao (A Veiga) e Fontei (A Rúa), e pola tarde O Barco de Valdeorras no barrio do Campo.
Os anos pasan, cambia a vida social e a situación da poboación, mesmo cambian os párrocos, pero o que permanece inalterable é a devoción e as tradicións. Así tras dous anos sen levarse a cabo debido ás restricións do Covid 19, neste 2022 a celebración de San Antón recuperábase neste barrio barquense co acto central coma sempre no pavillón polideportivo de Calabagueiros, transformado nun improvisado templo.
Marcada polas altas temperaturas, inusuais para esta época do ano (os termómetros pasaban dos 35º) a eucaristía arrancaba ás oito da tarde deste luns 13 de xuño presidida polo novo párroco do Barco, Jesús Álvarez, contando asemade coa presenza doutros tres sacerdotes, entre eles o párroco de Rubiá. Coma sempre, durante a solemne celebración tiña lugar a bendición de familias, nenos, noivas, pans e veas, xa que San Antonio é coñecido como “o santo do mundo” por ser venerado en diferentes países, pero tamén como protector do ser humano en xeral.
Fotos: Carlos G. Hervella.