As infraccións penais seguen a descender na comarca de O Carballiño. Son datos estatísticos amosados durante a xunta local de seguridade que se celebrou hoxe na casa consistorial da vila ourensá. Na devandita reunión estiveron presentes o subdelegado do Goberno en Ourense, Roberto Castro, o alcalde da vila, Francisco José Fumega, e o xefe territorial de Presidencia, Administracións Públicas e Xustiza, Manuel Pardo, así como outros membros do goberno local como o edil de Turismo, Xosé Manuel Dacal. De igual xeito, participaron membros dos Corpos e Forzas de Seguridade do Estado e da Policía Local.
Os informes expostos amosan que a totalidade de infraccións penais marca unha tendencia á baixa, con 19 puntos menos. Os delitos contabilizados descenden levemente, dous puntos, mentres os delitos leves diminúen ate os 17 puntos. Tamén descenden as infraccións penais sen delito contra a seguridade vial e as infraccións administrativas. Así mesmo, é menor o número de detidos e imputados.
Castro agradeceu ás Forzas E Corpos de Seguridade do Estado e á Policía Local “o magnífico traballo diario desenvolvido a prol do benestar da cidadanía reflectido nas estatísticas que hoxe acabamos de coñecer”. Animoutos a seguir incidindo na mesma tarefa “de compromiso, tanto no campo da investigación de casos pendentes como no eido preventivo de cara ao futuro.”
