Facía tempo que non se vía un resultado así no campo municipal de Calabagueiros, nun partido de liga. Cun contundente 5-1 remataba o CD Barco-CD Moaña disputado na tarde deste domingo 28 de abril, o elixido pola directiva do Centro de Deportes Barco para abrir o campo á poboación valdeorresa e convidar aos afeccionados a mini hamburguesas.
O partido correspondente á xornada 31 da preferente sur Galicia poñíase pronto de cara para os barquenses con dous temperáns goles de Javi Pazos, nos minutos 1 e 4. Os de Lino Estévez seguían moi centrados no partido e Judy non tardaba en poñer o 3-0 co seu primeiro gol no minuto 10.
No 30′ os visitantes recurtaban distancias pero no 35′ Judy volvía marcar para os vermellos. Co 4-1 chegaba o descanso e con el o convite a merendar e tralo paso polo vestiario Óscar Martín sentenciaba o encontro transformando un penalti no minuto 88.
Co 5-1 final, o CD Barco sitúase no posto 13º da clasificación. A seguinte cita será de Copa, o mércores 1 de maio en casa contra o Atlético Arnoia.
Fotos: Mónica G. Bellver.
