Na tanda de penaltis tras un partido moi igualado. Así conseguía o CD Barco a copa do VIII Memorial Miguel Fariñas disputado na tarde do sábado 19 de agosto en Calabagueiros.
Como un dos partidos amigables de pretempada se presentaba o partido entre o CD Barco e o CD Velle, que servía tamén como lembranza anual a Miguel Fariñas, fortemente vinculado ao club barquense que conta cunha escultura na entrada do Campo de Calabagueiros, e que finalmente se resolvía a favor do conxunto local nos penaltis tralo empate a ceros.
Dende o club barquense aseguran que as mellores oportunidades para os locais sucedéronse nos intres finais do partido, “con varios remates infrutuosos diante da portaría visitante”. Así, tralos 90 minutos regulamentarios o memorial decidíase dende a liña de penalti, cunha “sucesión de lanzamentos moi atinados por ambas as dúas partes. Só un erro do equipo de Velle no noveno lanzamento, seguido do acerto na execución polo bando local, desequilibrou a balanza a prol dos valdeorreses e deulles a conquista do trofeo en xogo”.
No campo de fútbol estaba a familia de Miguel Fariñas e a afección que pouco a pouco vai regresando á bancada de Calabagueiros para animar ao equipo nesta nova etapa.
Fotos: Carlos G. Hervella.