Tralo éxito dos campus celebrados no verán, coa participación de máis de 200 nenos, o CD Barco presenta a primeira edición do campus de fútbol de Nadal.
Así, neste mes de decembro (días 23, 24, 27, 28, 29, 30 e 31) en horario de 10 a 13:30 horas, o Campiño de Viloira acollerá o I Campus de Fútbol Deportivo Ocionadal 2021, para nenos e mozos de entre 5 e 17 anos, que serán distribuídos por idades.
Tal como avanzan dende o club barquense, a previsión é organizar dous grupos de traballo, un de iniciación e outro de tecnificación. No primeiro trataranse conceptos básicos de fútbol así como o cambio de monitorado respecto ao 2021, con actividades previamente acondicionadas aos nenos e idades. Tamén haberá xogos populares e xincana de actividades deportivas. No segundo, será xa para un nivel de fútbol avanzado, dirixido á preparación do inicio da competición, con valoración de test de capacidades e posta a punto compaxinado con actividades lúdicas.
Con respecto ás opcións, o grupo de 5 a 11 anos terá sesións de adestramento e actividades populares; o grupo de 12 a 17 anos terá sesións de adestramento específicas, test de habilidades, liguillas e competicións internas. O prezo será de 60 euros con desconto para participantes en campus anteriores e membros do CD Barco, e incluirá diploma clinic e progresión individualizada.
Aínda que o campus terá horario de mañá, tamén haberá opción de 4 tardes completas ata as 18 horas para o grupo dos maiores, no pavillón de deportes de Vilamartín, con actividades deportivas e proba de novidades para o campus de verán 2022. O prezo: +20 e adicionais.
Máis información nos teléfonos 663 465 584/ 667 404 330 e inscricións en Peluquería Nilo, no Barco.
