Santa Marta vén de sacar ao mercado un novo viño adicado a Manuel Álvarez, a cuarta elaboración de viño godello da adega de Córgomo (Vilamartín de Valdeorras). Teñen viño xove, viño tostado, o Fardelas e agora A Cercada de Viñaredo en homenaxe ao “avó Lolo”.
Pai de Chus e membro activo da adega, Lolo era un traballador máis en cada vendima, un viticultor apaixoado e unha persoa especial, un “ser de luz” que transmitía felicidade, alegría,… Falecía en 2016 e na adega pensaron que xa era hora de facerlle unha merecida homenaxe en forma de viño.
Pero A Cercada non é un viño máis senón que ten unha historia detrás. A da viña de nome homónimo que Lolo traballaba cando era xove con caballería e soñaba con adquirir, un soño que facía realidade unha vez xubilado.
Parte desa historia cóntaa a etiqueta da botella coa sinatura de puño e letra do propio Lolo cando mercou a viña; co home arando,… e será presentada no vindeiro partido do CD Córgomo Vilamartín (líder do grupo en 2ª Galicia) en casa. Será o sábado 23 de marzo ás 17 horas no Campiño de Viloira (O Barco) no derbi co CD Viana (segundo clasificado) no que renderán homenaxe ao alegre e traballador Lolo.
Fotos cedidas