CulturaCulturaEducaciónÚltima hora

O CEIP Julio Gurrirarán do Barco recolle na RAG o premio da Primavera das Letras de Florencio Delgado Gurriarán

Tamén recollían estas distincións os colexios de Seixalbo (Ourense) e Fondo de Nois (Foz)

Publicidade
Representantes do CEIP Julio Gurriarán na RAG./ Foto: RAG.

 

Os colexios de Seixalbo (Ourense), Fondo Nois (Foz) e Julio Gurriarán Canalejas (O Barco de Valdeorras) recolleron esta mañá na sede da Real Academia Galega os premios do concurso Contádenos o voso Día das Letras Galegas 2022, convocados pola institución ao abeiro de Primavera das Letras, o proxecto que dirixe ao público infantil. “Hoxe é un día de festa para a RAG, dá igual que chova, porque a Academia encheuse de primavera con todas e todos vós”, agradeceu Fina Casalderrey. A académica responsable desta iniciativa e o presidente da RAG, Víctor F. Freixanes, foron os encargados de lles entregar aos nenos e nenas dos tres centros educativos os premios que recoñecen os seus traballos sobre Florencio Delgado Gurriarán, o autor ao que a Academia lle rendeu homenaxe o pasado 17 de maio.

Víctor F. Freixanes e Fina Casalderrey agradecéronlles ás mestras e aos mestres o labor que desenvolven cada día para transmitirlles a lingua e a cultura galegas ás novas xeracións e lembraron que Primavera das Letras nace como un espazo de comunicación da RAG cos centros educativos. “Este proxecto creouse para establecer un vínculo, un fío que a una cos colexios de toda Galicia, coma se nos collésemos das mans alumnado, profesorado e nós dende a Academia para facer unha inmensa cadea humana e, coma intrépidos corsarios, defendermos a lingua”, compara Fina Casalderrey.

Con este obxectivo, Primavera das Letras, que conta dende a súa posta en marcha, no ano 2016, co apoio da Deputación da Coruña, enriquécese este curso cunha nova sección, “Lingua Guapa”. Desde este espazo a RAG ofrecerá recursos lúdicos e didácticos sobre lingua e literatura para o público infantil alén da figura protagonista do Día das Letras Galegas. A sección presentouse o pasado mes de setembro coa estrea da película A orixe da nosa lingua guapa, baseada nunha idea orixinal e coguionizada pola académica.

 

O Colexio de Seixalbo na RAG./ Foto: RAG.

 

Representación na sede da RAG

A entrega dos galardóns do concurso Contádenos o voso Día das Letras foi unha nova homenaxe a Florencio Delgado Gurriarán chea de alegría e música. Os tres centros gañadores recibiron cadanseu lote de libros para a biblioteca escolar e un diploma das mans do presidente da Academia e da académica responsable de Primavera das Letras.

Entre outras actividades arredor da vida e da obra do poeta e activista cultural valdeorrés, o profesorado do CEIP Fondo Nois organizou unha festa galego-mexicana para achegar o alumnado á traxectoria vital de Florencio Delgado Gurriarán, figura destacada do exilio galeguista en México, e aprendeulles aos cativos e cativas, a partir dos seus “Poemas mexicanos”, distintas danzas do mundo. Os máis de 40 nenos e nenas focenses que recolleron hoxe o seu premio trouxeron á Academia unha mostra destes bailes. Acompañáronos o director do colexio, Xoán Bieito García Lorenzo, as mestras Juana Mª Fernández Balseiro, María de Gracia Quiroga Labrada e Isabel Fernández Jonte, e o mestre Manuel Lamoso Oliver.

Os versos de Florencio Delgado Gurriarán tamén inspiraron o proxecto premiado do CEIP Julio Gurriarán Canalejas do Barco de Valdeorras, a comarca natal do homenaxeado. Vinte nenos e nenas deste centro interpretaron no acto a versión do poema “Aí vén o maio” coa que o centro concorreu ao concurso, acompañados coa guitarra do mestre de música Nacho Hermida. O videoclip premiado, protagonizado polos nenos e nenas de 5 anos baixo a dirección da súa titora, Beatriz Escuredo, e Nacho Hermida é un dos grandes éxitos escolares das Letras Galegas 2022 en Youtube, onde suma máis de 7000 visualizacións. O alumnado visitou A Coruña acompañado do propio Nacho Hermida e das mestras Susana Rodríguez, Aurora Vega e Marián Fernández.

Outro traballo escolar que suma milleiros de visualización nesta canle é Un minuto con Florencio, a videocreación do CEIP de Seixalbo feita en colaboración coa canle Tik Tak Draw a partir do guión escrito polo equipo de dinamización da lingua deste centro educativo ourensán. Na entrega do galardón a este traballo participaron os oito alumnos e alumnas que lle puxeron a voz en off ao vídeo, acompañados por Ánxela Barja, Dolores Casal, Manoli Fernández e Álex Vázquez, docentes do seu antigo centro escolar e do IES Universidade Laboral de Ourense, onde este curso comezaron 1º da ESO.

Artigos relacionados

Back to top button