Sobre a evolución da incidencia da pandemia en Galicia, no relativo á situación epidemiolóxica e asistencial e aos avances no Plan galego de vacinación fronte ao Covid, falaba o conselleiro de Sanidade, Julio García Comesaña na comparencia que realizaba hoxe, a petición propia, no Parlamento de Galicia.
Explicaba que grazas “á previsión na organización e loxística no desenvolvemento do Plan galego de vacinación, o domingo pasado a Xunta tiña vacinadas 546.630 persoas, o 23,1% da poboación. Esta semana prevense administrar 138.500 vacinas, polo que se remataría cunha estimación de 685.130 vacinas, que sería xa un 29% do total da poboación a vacinar”.
Na súa intervención, García Comesaña indicaba tamén que Galicia ten unha porcentaxe de vacinación de doses administradas do 93,2%, o que a sitúa na segunda comunidade do Estado neste apartado.
Comezo da vacinación de persoas con moi alto risco
Anunciou o comezo da vacinación no grupo de persoas con patoloxías de risco. Este proceso iniciarase, en primeiro lugar, con persoas en tratamento quimioterápico/radioterápico activo, enfermidade metastásica, persoas en diálise, pacientes VIH, persoas con inmundeficiencias primarias, pacientes transplantados e persoas con Síndrome de Down maiores de 40 anos, tal e como acordou o Consello Interterritorial do Sistema Nacional de Saúde, segundo Sanidade. Neste caso e para estes pacientes administrarase a vacina de Moderna, unhas 35.000 doses.
A sistemática será similar neste grupo salvo pacientes ingresados e a diálise, facendo coincidir, neste ultimo caso, a vacinación coas sesións.
O conselleito tamén indicaba que, da vacina de Janssen, está previsto que se reciban mañá 8.500 doses. Estas últimas, destinaranse á vacinación nos domicilios. De AstraZeneca está prevista a chegada de 7.500 vacinas, que permitirá levar a cabo unha vacinación masiva de 15.000 persoas do grupo de 60 a 65 anos, a vindeira fin de semana.
Iniciouse a vacinación a domicilio dos grandes dependentes e dos maiores de 80 anos que non puideron achegarse aos centros de saúde. Sen embargo, unhas horas despois da comparecencia do conselleiro, o Ministerio de Sanidade confirmaba a suspensión da distribución de vacinas de Janssen.
Paralelamente, Sanidade indica que se seguirá a vacinar aos grupos de idade de 75 a 79 e aos de 60 a 69. Neste apartado, o conselleiro remarcou que, no grupo de persoas maiores de 80 anos, xa se vacinou ao 92,5%.
O conselleiro remarcou que, o seu departamento, ten previsto que todas as áreas sanitarias teñan organizados as quendas de enfermería cunha programación semanal para que, no caso de recibirse un maior número de viais, se poida convocar unha vacinación masiva o máis axiña posible.
Ademais, tamén anunciou que a Xunta vai poñer, proximamente, a disposición da cidadanía, unha páxina web na que se poidan consultar todos os datos referidos ao proceso de vacinación, incluídas as campañas en marcha e os grupos de idade aos que afecta.
Vacinación prevista para a vindeira fin de semana
Probas PCR a disposición da cidadanía
O responsable da sanidade pública galega dixo que o seu departamento ten un novo obxectivo “que é poñer unha proba PCR a disposición da cidadanía sempre que o precisen”. A tal efecto, “renovamos o convenio co Colexio de Farmacéuticos de Pontevedra e continuaremos co desenvolvemento do asinado co da Coruña, xa iniciado, e temos intención de continuar con Lugo e Ourense”. Deste xeito, “os cidadáns poderán ter unha proba PCR de saliva á súa disposición se a precisan, e os resultados que obterán contarán con todas as garantías do sistema de saúde galego”. Dende a posta en marcha destes convenios, realizáronse 41.332 probas, das que 79 resultaron positivas.
García Comesaña agradeceu o esforzo que ten feito toda a cidadanía galega no cumprimento das medidas de prevención, “que posibilita que se poda seguir a falar de datos estables en Galicia con respecto á evolución da pandemia”. Tamén volveu agradecer o traballo dos sanitarios e dos membros do comité clínico.
O conselleiro remarcou, como unha das cifras máis importantes, o feito de que Galicia sexa a comunidade da península con menor taxa de mortalidade desde o comezo da pandemia, 85,2 por cada 100.000 habitantes.
Incidiu, asi mesmo, no importante esforzo diágnostico que se está a levar a cabo, sinalando que, entre o 2 e o 8 de abril, realizáronse 48.000 probas diagnósticas, e, entre o 6 e o 9 de abril, cribáronse a un total de 35.139 persoas nos concellos con maior incidencia, ademais de ter citado, para esta semana en curso, a máis de 47.000 cidadáns.
García Comesaña volveu pedir de novo á poboación que acuda cando sexan chamados aos cribados, por responsabilidade social. A estas actuacións, o conselleiro engadiu, tamén, a posta en marcha da campaña de reforzo do cumprimento das medidas sanitarias fronte á covid, que realiza o persoal inspector de saúde pública, e que agora vaise ampliar máis aló do mes de abril, data na que estaba previsto que rematara. Dende febreiro, cando se puxo en marcha, realizáronse un total de 11.790 visitas, delas 5.733 a locais de restauración, 3.950 a tendas de alimentación, e 1.647 a instalacións deportivas, entre outras, detectándose 3.233 incumprimentos.
Plan funcional Unidades PostCovid
O conselleiro de Sanidade sinalou que as unidades PostCovid, que vén de poñer en marcha o Sergas para ofrecerlle aos pacientes que teñen superado a enfermidade unha atención específica, xa teñen aprobado o seu plan funcional, e están constituídas e con coordinadores designados nas sete áreas galegas. Esta semana levarase a cabo unha formación telemática dos profesionais de primaria, que se centrará no funcionamento das unidades, dado que este nivel asistencial será unha das portas de entrada destes pacientes.
Así mesmo, o titular de Sanidade adiantou que, antes de que remate este mes, o Consello da Xunta autorizará a convocatoria da cobertura de 120 prazas do Plan de Saúde Mental, para reforzar a atención das consecuencias desta pandemia na poboación.
