Nesta semana abríase ao público a exposición “Retrato dun tempo da plástica galega”, o novo proxecto da Xunta de Galicia e Afundación co que se rende homenaxe a un centenar de artistas galegos. Trátase dunha iniciativa do fotógrafo Xulio Gil, que se poderá visitar na rúa Policarpo Sanz de Vigo ata o 11 de novembro.
Nesta proposta inclúense retratos de persoeiros de referencia na arte galega, entre os que pode verse o do escultor valdeorrés Luis Fernández “Cochorro”, que vive e desenvolve a súa obra en Rubiá. Xunto a el, imaxe de Laxeiro, Isaac Díaz Pardo, Chelo Rodríguez, Menchu Lamas, Francisco Leiro, Antón Patiño, Din Matamoro, Berta Cáccamo, Manuel Quintana Martelo, Ángeles Iglesias, Manolo Buciños ou Soledad Penalta.
A idea deste proxecto expositivo tivo o berce no ano 1988 co gallo da exposición “Antropolóxicas” promovida por Enrique Acuña e continuado posteriormente coas fotografías para a colección Artistas Galegos dirixida por Antón Pulido. Desde entón, foi sumando imaxes a unha colección que foi xermolando no tempo cun elenco cada vez maior.
En concreto, a exposición componse dun cento de imaxes de gran formato, acompañado dun catálogo editado pola Xunta de Galicia.
O creador valdeorrés, acompañado da súa esposa, acudía ao acto inaugural desta mostra, celebrado o pasado 13 de setembro.
Fotos cedidas.
