Dende A Rodeleira ata a praza José Luís Núñez. É o percorrido que na tarde deste sábado 19 de febreiro completaban os oito folións participantes no esperado encontro organizado por Os Viticultores de Vilamartín.
Como bo anfitrión, o folión local era o que abría o desfile en torno ás seis da tarde, marcando o ritmo polas rúas de Vilamartín de Valdeorras. De seguido tocáballe o turno ao folión O Irrio de Castro Caldelas, seguindo os Labregos de Trives, o Folión de Carracedo da Serra (A Gudiña), As Maceiras de Trives, Os Arrieiros de Petín, Lardeira de Piñeiro (Trives) e por último A Caniceira tamén de Trives.
Como broche ao encontro, nos últimos anos antes da pandemia celebrábase a Festa das Sopas de Allo, cunha cea no pavillón municipal de Vilamartín, pero este ano por mor do protocolo de Sanidade non se pudo celebrar, rematando a xuntanza na praza cun bocadillo para cada participante.
Con este desfile ábrese o Entroido en Vilamartín, localidade valdeorresa que o vindeiro sábado 26 de febreiro recuperará o desfile de comparsas organizado polo Concello co mesmo percorrido, dende A Rodeleira ata a praza, onde haberá animación musical a cargo da discoteca móbil Danzalia.
Fotos: Mónica G. Bellver.
