A comparsa musical (banda de gaitas) que acompaña ao Touro e o Xigante de Celavente xunto co Folión de Buxán, son os símbolos do Entroido que se conservan no concello do Bolo e este ano, ademais das súas propias saídas facíano xuntos.
A comparsa de Celavente sairá coma sempre o Domingo de Entroido achegándose ata o Miradoiro da Salesa, a Residencia da Terceira Idade do Bolo e as escolas de Celavente onde rematarán, pero neste venres 9 de febreiro compartían xornada co folión no Entroido organizado dende o Concello.
Pola mañá as Mázcaras de Buxán visitaban co Touro e o Xigante aos nenos do colexio; e xa pola tarde, ás 20 horas saía o Folión de Buxán do Bar Murias (Cambela) e a comparsa de Celavente do Restaurante Boa Vista (Lentellais) para xuntos dar unha ronda por O Bolo con paradas en alomenos tres adegas, tocando e embestido a todo aquel que non vaia disfrazado, ritual que segue esta peculiar parella (Touro e Xigante) antes de rematar no pavillón, cun concurso de disfraces para o nenos e unha petiscada.
Fotos: Carlos G. Hervella.
