Continúan ascendendo de forma notable cifras do coronavirus na provincia. A Área Sanitaria de Ourense, Verín e O Barco ten 2.107 pacientes con infección activa, 147 máis que onte, segundo os últimos datos publicados esta mañá pola Consellería de Sanidade e actualizados ás 18h. do 19 de xaneiro. Aínda así, baixan lixeiramente os novos casos confirmados por PCR nas últimas 24 horas, un total de 159 (fronte aos 163 de onte).
En canto aos ingresos rexístrase certa estabilidade con 103 persoas hospitalizados en planta (2 menos que onte) e 10 na Unidade de Coidados Intensivos (2 máis que onte). O Hospital Público de Valdeorras ten 3 ingresos en planta, 1 máis que onte; o Hospital de Verín ten 13 ingresos en planta (1 máis que onte) e o Hospital Universitario de Ourense ten 84 en planta (5 menos que onte) e 10 na Unidade de Coidados Intensivos (2 máis que onte). A Clínica Santa Teresa rexistra 2 ingresos en planta e o Centro Médico El Carmen 1 en planta.
O total de casos rexistrados ata o de agora na provincia ascende a 10.947, con 8.519 curados e 321 falecidos (onte Sanidade non notificaba ningún falecemento na provincia). Polo de agora lévanse realizado 158.507 probas PCR e 73.220 probas serolóxicas.
