Mañá, sábado 7 de marzo, celebrarase no Hotel Coia a VI Festa do Botelo do Barco en Vigo. Alí, segundo as previsións, preto de 200 comensais degustarán o singular botelo acompañado de cachelos e verdura pechando así a tempada de promoción deste embutido valdeorrés fóra das súas terras de orixe.
O xantar comezará ás 14 horas con sopa e empanada de maravallas; a continuación servirase o botelo, e como sobremesa a torta de roxóns. Todo elo acompañado con viños de Valdeorras. O prezo da comida é de 28 euros por persoa. O acto pechará cunha actuación musical. O actor, contador de contos e monologuista, Avelino González, será un dos convidados xunto con outras personalidades da cidade olívica.