O Entroido de Xinzo é o máis longo de Europa xa que ofrece cinco domingos de festexos e diversión, do Domingo Fareleiro ao de Piñata, aínda que este este ano, o Covid impediu a súa celebración. O Domingo Oleiro que debería terse celebrado o 31 de xaneiro é un dos máis característicos pero este ano unicamente algúns veciños se animaron a lazar as olas en casa para posteriormente subir os vídeos e fotos ás redes sociais.
Con todo, é o Colgamento do Meco o que dá cada ano o pistoletazo de saída á festa. Este ano non houbo acto pero si colgaron ao meco na praza Maior cun mono de protección e máscara anticovid representando o non Entroido 2021. Tampouco faltou quen se animara a decorar os balcóns con símbolos desta ancentral tradición.
Din os entroideiros de Xinzo que o seu é un sentimento por iso están especialmente tristes. Aseguran que están todo o ano pensando nesta data e hoxe están desanimados porque o Entroido de Xinzo, dos poucos declarado festa de interese internacional non deixara de celebrarse nin durante a guerra civil nin na ditadura, malia estar prohibido.
Este ano non poderá ser, pero non faltará quen saia á rúa disfrazado, aínda que só sexa para ir mercar o pan, e, de seguro que se escoitan as campaíñas e o bater das vexigas dalgunha Pantalla, a raíña do Entroido en Xinzo, aínda que sexa de lonxe e en solitario.
