O conselleiro de Cultura, Educación e Ordenación Universitaria, Román Rodríguez, acompañado do secretario xeral de Cultura, Anxo Lorenzo, e do deputado autonómico Moisés Blanco visitaron o museo da Casa da Troia que abre as portas durante a Semana Santa.
A Casa da Troia é un museo romántico, que recrea a pensión de estudantes e a vida universitaria de Santiago a finais do século XIX que inmortalizou Alejandro Pérez Lugín na súa novela “La Casa de la Troya”. Nela aloxábase o personaxe principal, Gerardo Roquer, e os seus compañeiros de estudos.
Está situado na Rúa da Troia, 5 de Santiago de Compostela e o horario de visitas é do venres 18 ao domingo 27 de marzo (luns 21 pechado) de 11 a 14 e 16 a 20 horas. As visitas en grupo non poden superar as dez persoas e o prezo é de 2 euros, con tarifa especial para estudantes, xubilados, pensionistas e peregrinos de 1 euro; e para grupos de 0,60 euros por persoa.