As instalacións do parque acuático do Complexo Deportivo de Monterrei, no concello ourensán do Pereiro de Aguiar, abrirán ao público mañá, mércores día 9, poñéndose en marcha as piscinas infantil, relax e de ondas, así como a zona splash, o acceso independente, vestiarios e aseos.
Así o anunciaba o vicepresidente primeiro e conselleiro de Presidencia, Xustiza e Deportes, Diego Calvo, na visita que realizaba ao parque acompañado polo secretario xeral para o Deporte, José Ramón Lete Lasa, e o delegado territorial da Xunta en Ourense, Gabriel Alén, visitaba hai uns días
Segundo indicou Diego Calvo, a entrada será gratuíta para todo o público, co fin de compensar o feito de que nesta campaña de verán as piscinas abran de xeito parcial. O vicepresidente primeiro mostrou o convencemento de que na época estival de 2024 se poderá desfrutar da primeira fase ao completo. Isto suporá engadirlle á oferta dúas novas zonas con tobogáns, mentres que a segunda fase estará xa en execución. Cómpre salientar que esta primeira apertura estará independizada do resto da obra, que segue o seu curso de cara a rematar tamén as outras tres fases do complexo acuático. Durante a execución das obras poderanse utilizar en todo momento as instalacións xa existentes ou finalizadas.