Nin o disputado contra o rival máis perigoso, nin sequera o xogado contra o líder, o desta tarde foi sen dúbida o partido máis duro para a familia do Tres Cuñados FS. O sábado 4 de febreiro, disputaba en casa, en Calabagueiros, o encontro correspondente á 15ª xornada de liga en 2ª división B contra o Xove FS, e facíao sen o seu piar: os irmáns Carrera, vítimas dun accidente de tráfico.
Na tarde do 28 de xaneiro, de viaxe a Cuéllar (Segovia) para xogar outro partido de liga, a estrada volvía cobrarse unha vida, desta volta a dun xove e prometedor xogador de fútbol sala. Jesús Carrera Carrera “Jess”, o número 3 do equipo valdeorrés, perdía a vida con 24 anos, case sen tempo de demostrar o que valía. “A súa técnica era excepcional, tiña cualidades e unha gran proxección, era un crack e tiña nivel de prata”, asegura o adestrador. O irmán do xogador, Bruno, compañeiro dentro e fóra da cancha, viaxaba con el e resultaba gravemente ferido. Das lesións físicas estase recuperando, das emocionais o tempo dirá.
O accidente que conmocionou a Valdeorras e ao mundo do deporte, supuxo a fractura da columna vertebral do equipo. Xa nada será igual pero despois de moito dubidar, por manter vivo o que tanto amaba Jesús, o club decidía seguir na liga, aínda que o futuro é incerto.
De momento, á espera de que Bruno se recupere e regrese á cancha, Valdeorras despedía ao “eterno número 3” dos Tres Cuñados FS nun emotivo partido coas bancadas cheas, no que as bágoas (dos seus compañeiros de equipo, dos familiares, dos amigos,…) mesturábanse co xogo e coas ganas de facer un bo partido, por Jess. Tanto os xogadores do equipo valdeorrés, como os do club visitantes, lucían un brazalete negro en sinal de loito.
O resultado era o de menos pero despois do minuto de silencio, os xogadores valdeorreses centrábanse no partido adicando ao seu compañeiro cada gol. Ao final foron 5, logrando un meritorio empate do que sen dúbida estaría orgulloso.
A vida segue pero o deporte valdeorrés estará durante moito tempo de loito. Ata sempre Jess.
Fotos: Carlos G. Hervella.
