O perruqueiro Gonzalo Zarauza, estrela na gala de perruquería de Ourense

A Asociación de Empresarios de Perruquería e Salóns de Beleza de Ourense, en colaboración coa Deputación ourensá, pon en marcha a gala ‘Pasión por el cabello’. Trátase dun evento que se desenvolverá sobre as táboas do Teatro Principal da cidade o vindeiro 15 de maio co obxectivo de dar a coñecer os últimos avances no sector da perruquería.

A gala foi presentada na mañá do 11 de maio pola presidenta da asociación organizadora, Beatriz Gómez, e o vicepresidente do ente provincial, Rosendo Ferández. Durante o acto, desvelaron algúns dos detalles da programación, como a participación de Gonzalo Zarauza, considerado un dos mellores perruqueiros de España e autor de libros e material didáctico no ámbito dos peiteados e a beleza.