A intensa chuvia e o frío marcaban a XIV Carreira Popular da Feira do Viño de Quiroga, que se encetaba a partir das 16:15h deste Venres Santo coas carreiras das categorías base. A proba dos maiores daba comezo arredor das cinco da tarde, con saída e meta dende o centro da vila. Antes, rendíaselle unha homenaxe ao atleta veterano valdeorrés Manuel García Alfonso (Adas), que tamén disputaba a proba.
A partir de aí dábase a saída e os corredores afrontaban un circuíto duns 9 km. O primeiro en cruzar a liña de meta era o tamén valdeorrés Alejo Ares (Adas), cun tempo de 00:28.57. Tras cruzar a liña de meta, este atleta valoraba con satisfacción o resultado e sinalaba que esta carreira “gustoume bastante, é moi bonita, pero pasei bastante frío e iso restoulle un pouco”. Despois de Ares entraba Javier Neira (Monumental CXC) e, na terceira posición, o barquense Iván Fernández.
Na categoría sénior feminina impoñíase Begoña Domínguez (Atletismo Arenteiro), sendo a segunda e a terceira clasificadas Carla de Dios (Club Natación Pabellón Ourense) e Cristin M. Martínez, respectivamente.
Esta carreira popular, que organiza o Concello de Quiroga a través da súa Área de Deportes, constitúe o limiar deportivo da Feira do Viño de Quiroga, cuxo recinto feiral se abrirá ao público mañá 31 de marzo a partires do mediodía.
Fotos: Carlos G. Hervella.