Os escolares dos centros CEIP O Ruxidoiro e CEIP Filomena Dato de Barbadás farán mañá, 19 de abril, unha ruta en bicicleta polas rúas deste concello para celebrar o Día Mundial da Bicicleta.
Os primeiros en botarse aos pedais serán os rapaces e rapazas de O Ruxidoiro, que sairán cara ás once da mañá do seu centro. O seu percorrido atravesará a avenida de Celanova, en A Valenzá, e seguirá por Cuartas, Silvas, Paz, rúa do Areal, Salgueiriños, a marxe esquerda do río dos Muíños, para logo continuar coa marxe dereita e seguir até o Parque dos Patos, a Calzada Romana para chegar ao campo de Fútbol, e rematar de novo no seu centro.
Pola súa banda, o alumnado do CEIP Filomena Dato sairán da Rúa da Presa para seguir pola rúa Tomás Rodríguez Puxín, Vilaescusa, a marxe esquerda do río dos Muiños ata Lameiro do Mato. Tras iso irán pola marxe dereita do río ata o Parque dos Patos, continuarán pola Calzada Romana ata o campo de Fútbol, a rúa do Paseo dos Ameiros, Rúa da Paz, rúa do Areal, rúa do Picouto e rematarán en rúa do Ensino.
