O sector educativo barquense e o comercio da vila volven unir forzas para conmemorar o Día das Letras Galegas. Así os seis centros educativos do Barco (a través dos seus Equipos de Dinamización da Lingua Galega) e o Centro Comercial Aberto (CCA) veñen de lanzar a campaña: “Revelando a Xela”, en homenaxe á poeta á que se lle adica o vindeiro 17 de maio.
O punto de partida da iniciativa estará nas aulas. O alumnado dos colexios Condesa Fenosa, Divina Pastora, Julio Gurriarán e Otero Pedrayo, así como o dos institutos Lauro Olmo e Martaguisela, realizarán fotografías baseándose nun verso ou poema de Xela Arias. Despois, os Equipos de Dinamización da Lingua Galega escollerán como máximo dez imaxes que representen a cada centro (o que suporá arredor de sesenta fotografías) que se exporán entre os días 13 e 31 de maio nos escaparates dos establecementos do CCA O Barco participantes na campaña.
Por outra banda, a xunta directiva do CCA O Barco, como representante do colectivo empresarial, votará polas seis mellores imaxes expostas nos comercios, bares e restaurantes da vila. Cada unha delas será premiada cun vale de compra por valor de 25 euros para investir en material escolar nas librerías do CCA O Barco: Caprichos, Murciego, Praxis e Yoli.
A entrega de premios terá lugar na oficina da asociación (situada na rúa España, 1 do Barco) o martes 8 de xuño.