Na mañá deste xoves 21 de novembro, os membros do GES de Castro Caldelas liberaraban a unha muller atrapada no interior do seu vehículo tras envorcar no quilómetro 36 da OU-536, en Seoane Vello, no concello de Montederramo.
Tal como explican dende o 112 Galicia o aviso chegáballes pouco antes das 9 horas, cando un particular informaba do accidente indicando que “a implicada estaba ferida leve pero atrapada no coche”.
Segundo informan, “os equipos de emerxencia procederon a excarcerar á muller polo maleteiro do vehículo e trasladárona en ambulancia ao centro hospitalario de referencia”.
No operativo participaron os servizos sanitarios, o GES de Castro Caldelas, a Garda Civil de Tráfico e os operarios de mantemento da estrada.
