Despois do éxito de participación logrado no acto promocional celebrado o 14 de xullo en Santiago, a Casa de Galicia en Madrid acollerá o 22 de xullo unha nova mostra itinerante dos viños da Denominación de Orixe Monterrei. Alí presentaranse 46 marcas de 19 adegas desta zona ourensá.
Esta xornada está dirixida a medios de comunicación e a colectivos profesionais relacionados co sector vitivinícola (hostaleiros, distribuidores, sumilleres, etc.). Nela participará a presidenta do Consello Regulador da D.O. Monterrei, Asunción Rodríguez, que estará acompañada por técnicos deste órgano réctor e tamén polo experto Luis Paadín, que se encargará de ofrecer as explicacións técnicas de cada un dos viños.
Ademais prevese contar coa asistencia, entre outros profesionais, da enóloga e presidenta da Asociación Española de Periodistias e Escritores do Viño, María Isabel Mijares, o presidente da Asociación Madrileña de Sumilleres, Javier Gila, e o delegado da Xunta en Madrid e director da Casa de Galicia na capital española, José Ramón Ónega.
Ao mesmo tempo, ao longo do 22 de xullo na Casa de Galicia estará aberto o “Túnel do Viño de Monterrei” de 11h. a 14h. e de 18h. a 21h. As persoas interesadas en adquirir algún dos viños da mostra poderán facelo nun punto de venda que se habilitará nestas mesmas instalacións.