Mañá luns 14 de decembro, os tintos e brancos da Denominación de Orixe Monterrei formarán parte da ‘Experiencia Verema’, que se celebrará na cidade condal. Esta cita está destinada a profesionais da canle HORECA (restauración, sumillería, distribución, importadores, etc.), amantes do viño e usuarios de Verema. com. A actividade terá un horario de 12h. a 15h. e de 17h. a 21h., e permitirá achegar aos viños de Monterrei ao público de Barcelona.
A través desta experiencia os visitantes poderán coñecer, in situ, as elaboracións das seguintes adegas rexistradas no CRDO Monterrei: Ladairo, Pazos do Rey, Gargalo, José Antonio Da Silva Pereira (Viños Lara), Quinta do Buble, Terras do Cigarrón, Pazo Blanco Núñez (Tapias Mariñán), Fragas do Lecer, Manuel Guerra Xusto, Tabú, Franco Basalo, Alba Ao-Bar (Daniel Fernández), Trasdovento, José Luis Gómez Ibáñez (Valderello), Crego e Monaguillo, Fausto Rivero Pardo (Quinta Soutullo), Pazo de Valdeconde, Castro de Lobarzán, Manuel Vázquez Losada, Terrae Monterrei ( Adegas Terrae) e Triay Adegas de Oímbra.
Ademais poderán descubrir as características do territorio (chan, clima e variedades), historia e patrimonio vitivinícola, ou a tipoloxía de viños, entre outras cuestións. O evento, que se celebrará no Hotel El Palace Barcelona, contará con todas as medidas de hixiene e seguridade necesarias marcadas polo protocolo do espazo e polas propias do evento. Trátase do primeiro evento ‘Experiencia Verema’ á que asiste a D.O. Monterrei neste ano 2020, que repetirá participación, na próxima experiencia prevista antes de final de ano en Murcia.
“Agardamos que esta iniciativa teña a mesma acollida que as últimas actividades promocionais realizadas en Vigo e A Coruña”, manifesta a presidenta do C. R.D.O. Monterrei, Lara Da Silva, “e que sexan moitos os que acudan a descubrir os nosos viños e, por suposto, os leven ás súas cestas de Nadal, da compra e ás súas mesas nestas datas”.
