A primeira vez que o arquitecto e artista visual arxentino Óscar Padrevecchi expoñía en España, foi no proxecto “MirArte” na céntrica tenda Miranda Moda no Barco de Valdeorras, onde vive dende o ano 2020. “Primeiro namoreime dunha barquense e despois do propio Barco polo que me dá moita alegría que sexa aquí a presentación da miña obra e nun escaparate porque é un lugar público e iso anímame moito, é unha maneira de darme a coñecer”, destacaba nese momento, en maio de 2021.
Tres anos despois e logo de ter realizado xa varios murais na vila e mesmo o cartel da Festa do Botelo do Barco 2024, xurdía por fin a oportunidade de expoñer a súa obra nunha sala. Unha escolma de pinturas titulada El límite la verdad que dende a tarde do venres 12 de abril está exposta no segundo andar do Casino do Barco.
“Levo tempo traballando en obras que plasman as miñas impresións e vivencias no Barco que acabaron sendo parte dunha serie titulada O Barco no horizonte, como unha homenaxe a esta vila e ás súas xentes”, di Padrevecchi, que sempre traballa nun estilo contemporáneo e impresionismo abstracto.
Máis que pinturas, este artista arxentino define a súa obra como “obxectos pictóricos” porque ten que ver coa arte contemporánea onde prevalece a técnica mixta. “Ha unha mestura de música, poesía, arquitectura,… que sae á luz cando pinto”, di, recoñecendo a súa “obsesión pola raia, a liña que determina un límite, algo que vén condicionado pola miña faceta como arquitecto onde unha raia constrúe e pensa dalgún xeito. A pintura é máis intuitiva e a miña ten certa musicalidade e ten ritmo, velocidades, silencios…”
Na inauguración da exposición, que pode verse ata o 30 de abril, Óscar Padrevecchi estivo acompañado por moitos amigos, polo presidente do Casino, Pablo Dobao e pola concelleira de Cultura do Barco, Margarida Pizcueta. O horario de visitas é de xoves a domingo de 19 a 21 horas e el mesmo conducirá aos visitantes pola mostra.
Fotos cedidas
