Con diversos actos celebrará o Magosto este sábado 10 de novembro o Concello de Trives. Así, ás 11:30h. está previsto un “Paseo polos Sequeiros” con saída dende Pena Folenche. Este percorrido permitirá descubrir o engado dos soutos triveses no outono “pisando sobre alfombras de follas e cunha paisaxe chea de diferentes tonalidades. Ademais este é o mellor lugar para podercoñecer de primeira man como é o proceso do duro traballo da recollida e tamén o secado da castaña, onde a choiva quere estar presente moitas das veces”, indican dende o Concello de Trives. Trátase dunha ruta circularde arredor de 3 quilómetros, de dificultade baixa.
Tamén no marco dos festexos do Magosto, a partires das 16h. impartirase un obradoiro infantil de outono para nenos de entre 3 e e 12 anos. Incluirá actividades e manualidades relacionadas coas castañas na Biblioteca Municipal de Trives. Os cativos con idades de 3 a 6 anos deberán estar acompañados dun adulto durante toda a duración deste taller. O obradoiro será dirixido polas traballadoras da biblioteca. Despois, xa ás 18:30h. comezarán os festexos do Magosto propiamente dito no Patio de Santa Leonor.
O prezo será de 5€ para os asistentes de 12 anos en adiante, de 2,50€ para as idades entre 7 e 12, ambos incluídos, e de balde para os menores de 7 anos. Ademais volverá a convocarse o Certame de Doces Típicos de Outono, que xa vai pola súa sexta edición. “Será na sobremesa do magosto onde se degustarán os doces participantes e onde se lles entregarán os agasallos aos grandes reposteiros”, adiantan dende o Concello.
Tamén nesa mesma festa farase entrega dos premios ás ganadoras do “II Concurso do Magosto Literario”, que recibirá un premio de 100€ e un lote de libros.
