O delegado do Goberno en Galicia, Pedro Blanco, salientou a acción do Goberno no ferrocarril de Ourense, consolidándose como “un polo do transporte en España con máis de 625 millóns de euros investidos”. Facíao durante a visita realizada na mañá deste luns 28 de outubro para supervisar o comezo das obras de remodelación da Estación de San Francisco para albergar o novo Centro de Regulación da Circulación (CRC). O delegado estivo acompañado polo alcalde da cidade, Gonzalo Pérez Jácome; o subdelegado do Goberno na provincia, Eladio Santos, e o subdirector da Rede Noroeste de Adif, Abel Rajo.
Pedro Blanco puxo en valor que a obra combina a recuperación do patrimonio ferroviario galego coa tecnoloxía de última xeración para centralizar a xestión das liñas de Galicia e responder ao incremento de tráfico, de xeito que “un edificio histórico coma este vai volver a operar na vangarda do máis alto rendemento a nivel galego”. O futuro CRC substituirá e ampliará ao actual centro de xestión ferroviaria situado na Estación de Ourense.
“O Goberno de España demostra con feitos e investimento o seu compromiso co tren galego e coa provincia e a cidade de Ourense, convertida nun gran nodo ferroviario con máis de 625 M€ do Goberno”, engadiu o delegado. Concretamente, a renovación da estación de San Francisco e a completa instalación dos sistemas do CRC cífranse en 14,5 millóns de euros, mentres que outras obras como a variante da cidade alcanza os 500 millóns ou a estación intermodal ascende ata os 112 millóns de euros.
Tal como indican dende a consellería, o futuro CRC xestionará a circulación de trens ao longo de 1.151 km de liñas en Galicia, ao asumir os tramos Ourense-Santiago de alta velocidade e a liña de ancho métrico Ferrol-Ribadeo. Será, polo tanto, un centro multirede, xa que xestionará os tres anchos métricos que hai actualmente en España.
No edificio da antiga estación vaise levar a cabo un reacondicionamento completo das estruturas, cubertas, fachadas e accesos, ademais dunha restauración de todos aqueles elementos arquitectónicos decorativos que o precisen. Habilitarase un novo acceso independente do uso da plataforma da liña de alta velocidade, desde a rúa Serra de Queixa, incorporándose as prazas de aparcamento necesarias para os usuarios do edificio.
A actuación do novo completarase coa renovación de equipos do CTC, a instalación dun Videowall, consolas de operación, equipamento e o traslado do telemando de enerxía existente na Estación de Ourense Empalme.
