Impresionante. Cunha altísima participación e numeroso público durante os cinco días, segundo o presidente do CD Barco Nilo Ramos, se desenvolvía esta edición da ‘Valdeorras Perullo Cup’. O torneo de fútbol 7 organizado polo club barquense reunía este ano a 38 equipos de categorías base, aínda que tal como explica Ramos, os interesados en participar eran 46. “Tivemos que pechar a inscrición en 38 porque había moitos equipos xuvenís e non tiñamos horas para todos porque coindicía coa ABAU”, di, cansado pero satisfeito tras cinco intensos días de fútbol base.
Na tarde do sábado disputábanse tres finais. Na categoría prebenxamín, o SD Ponferradina impoñíase a CF Monforte 5-2; en infantil o CD Rúa vencía 3-1 a Sables FC; e en xuvenil o CD Barco vencía 2-0 a Astutos Luma FC.
E xa na tarde deste domingo era a quenda das outras tres finais. Na categoría benxamín o CD Barco vencía 4-3 a Unión Cacabelense; en alevín o Rúa vencía 6-2 á SD Ponferradina; e en cadete Relámpagos de Puzmazán JR. impoñíase a Atlético Bembibre.
Fotos e vídeos: Mónica G. Bellver excepto a última da galería que é cedida.
