Mañá, venres 16 de marzo ás 10:30h. terá lugar na Casa do Río Cigüeño (O Barco de Valdeorras) unha reunión de alto nivel para clarificar as posicións con respecto ao corredor ferroviario do Atlántico, previa á reunión que a alcaldesa de Ponferrada Gloria Fernández e o alcalde do Barco Alfredo García teñen intención de solicitar ao Ministro de Fomento con carácter urxente.
Trátase dunha reunión organizada polo Eixo Atlántico e os Concellos do Barco e Ponferrada baixo o lema “Cumbre sobre o corredor atlántico Ferroviario”, e contará coa presenza de Ferrán Tarradellas, representante da Comisión Europea, de representantes da dirección xeral de ADIF, así como de Fernando González Laxe e Miguel Rodríguez Bugarín, asesores do Eixo Atlántico en materia portuaria e ferroviaria respectivamente. Tamén foron convidados os alcaldes das comarcas de Valdeorras, Lemos e Bierzo, así como representantes das asociacións empresariais destas comarcas, centrais sindicais e representantes de partidos políticos.