No ano 2008 en que se cumprían 50 anos do asolagamento de Alberguería (no concello da Veiga) baixo as augas do encoro, fundábase a Asociacion Cultural Alberguería Oleiros (ACAO), co fin de manter viva a memoria do pobo e dos veciños que tiveron que emigrar a diferentes puntos de España e tamén do estranxeiro. Seis anos despois, en xuño deste mesmo ano 2014, a asociación renovaba a directiva poñéndose ao fronte Manuel Paradelo.
O propio Paradelo, adianta que neste mes de agosto, os antigos veciños e amigos “que somentes nos vemos unha vez ao ano”, xuntaranse de novo no poboado de Prada, para celebrar a tradicional romaría. Será o venres 15 de agosto e coma sempre haberá procesión e misa ao aire libre (en torno ás 12:30h.), seguida polo xantar popular e xogos como os bolos, para todo aquel que queira participar, sen esquecer o apartado musical. “A idea é pasar un día todos xuntos” di Manuel, esperando contar coa presenza de veciños chegados incluso de Bos Aires (Arxentina), onde reside unha parte da poboación da desaparecida Alberguería.
