Arredor de 500 persoas participarán no desfile do Carnaval de Verán que se celebrará este sábado, 15 de xullo, polas rúas máis céntricas do Carballiño. Charangas, murgas, comparsas e folións intervirán no percorrido, que comezará ás 22:00 horas dende a Praza da Veracruz e proseguirá polas rúas Curros Enríquez, Rotonda da Alameda e praza do Emigrante, avenida Xullo R. Soto, Centro do Carballiño en Bos Aires e rúa do Paseo.
Moitas das agrupacións que concursaron no pasado Entroido de inverno voltarán a desfilar este sábado, pero haberá novas incorporacións como a comparsa Os Festicultores Troupe. Ademáis, participarán Os Liborianos, Os Azucarados de Maside, Os Silleiros Árabes, O Conto de Carapuchiña, Mouchos de Fantasía (AAVV Partovia), Guardianes de la Primavera (Dacón), Sol e Súper Lúa (San Amaro), Os Nevadiños (Neves de Grixoa), Aspadisi, así como a charanga do Dr. Anchoa, entre outros.
A partir da unha da madrugada, haberá festa coa actuación do grupo GIM TONICS na Praza Maior.
Pero o sábado 15 é día de feira no Carballiño, polo que durante a mañá haberá animación musical polas rúas. Así, o grupo Os Serandeiros ofrecerán pasarrúas a partir das 11 e ata o mediodía.
Un día antes, o venres 14, celebrarase o Carnaval de Verán Infantil. Comezará ás 11 da mañá nos arredores da Praza Maior, con actividades de animación e obradoiros. Neste carnaval participarán os nenos e nenas dos campamentos urbanos, ademáis de cantos rapaces queiran incorporarse por libre.
