Tralo duro ano pasado no que practicamente non houbo actividades de carácter lúdico, neste 2022 vanse recuperando moitas delas e polo menos poderase celebrar o Entroido a finais de febreiro, aínda que de forma diferente aos anos anteriores á pandemia.
Polo menos así será en Rubiá. Este ano o Concello non organizará o tradicional desfile de comparsas e folións que na tarde do Domingo de Entroido enchía de cor e música a rúa principal da vila, pero no seu lugar organizarán unha actividade especialmente pensada para os máis pequenos.
Así, o domingo 27 de febreiro, a partir das cinco da tarde, celebrarase na praza do Concello o ‘Entroido Miúdo’ con actuación musical incluída e chocolatada ao remate. Tal como adiantan dende a organización unha condición imprescindible para asistir será “ir revestido”.
