“Por fin hoxe podemos confirmar algo no que levamos meses traballando. San Xoán de Río convertirase neste 2020 no referente da Cultura Rural galega con este concurso”, destaca con satisfacción o alcalde de San Xoán de Río, Xosé Miguel Pérez Blecua.
Este Concello, co apoio e patrocinio da Secretaría Xeral de Política Lingüística da Xunta e coa colaboración da Editorial Galaxia, vén de convoca o “I Premio de Novela da Galicia Rural” para o ano 2020.
A el poderán optar aqueles autores que “presenten novelas orixinais e inéditas, non publicadas ou divulgadas, en todo ou en parte, por calquera medio físico ou electrónico, escritas en lingua galega segundo a normativa RAG/ILG, que sitúen a súa trama na Galicia rural ou que concedan a esta un protagonismo relevante na narración”, segundo as bases, que poden consultarse en https://www.lingua.gal/a-secretaria-xeral/convocatorias/_/Premios/convocatoria_0103/premio-novela-galicia-rural .
As obras, cunha extensión mínima de 100 páxinas, deberán ser enviadas antes do 30 de xuño do 2020 ao Concello de San Xoán de Río. O ditame do xurado farase público no mes de setembro.
O premio consistirá na edición da obra por parte da Editorial Galaxia, unha contía en metálico de 1.000 euros máis a entrega dun diploma acreditativo, que será entregado nun acto público organizado polo Concello de San Xoán de Río.