Tendo como carta de presentación “o traballo realizado nestes catro anos”, o BNG concorre en Viana do Bolo ás vindeiras eleccións municipais do 26 de maio “co obxectivo de darlle” a este concello “outros catro de anos de goberno porque temos un programa, temos unhas ideas e as ganas de levalas a cabo”. Así o destacaba o seu cabeza de lista e actual alcalde, Secundino Fernández, no acto de presentación da candidatura desta formación ás eleccións municipais, nun acto celebrado na tarde do 3 de maio na Casa da Cultura de Viana do Bolo, contando coa presenza da portavoz nacional do BNG, Ana Pontón.
Os nacionalistas loitarán por facerse o 26 de maio “cunha maioría que nos permita gobernar con facilidade”, adiantaba Secundino Fernández, quen tamén aseguraba que estes “primeiros catro anos foron complexos, con atrancos”, e mesmo “foron anos duros a nivel persoal”, dicía amosando un agradecemento especial a “Mónica, compañeira infatigable”. Pero tamén resultaron catro anos “ilusionantes e de moito traballo e alegrías. Foron catro anos que significaron un cambio total, cunha actuación política dirixida á xente, aos veciños de Viana e coa Casa do Concello aberta”, engadía.
O candidato nacionalista sinalaba que “é necesario continuar coas políticas iniciadas” e aseguraba que, de seguir á fronte do goberno municipal, tres serán as súas premisas: “máxima eficacia e rendibilidade dos recursos públicos”, unha “actuación política na que prime a transparencia e a equidade” e unha “mellora das infraestruturas viarias locais, dos equipamentos sociais e edificios públicos; mellora dos servizos sociais, defensa dos sectores produtivos coa conseguinte creación de emprego”.
A de Secundino Fernández era a última intervención dun acto presentado por Susana Fernández, integrante da lista e actual concelleira do BNG en Viana, quen facía “un balance positivo no traballo desenvolvido” na lexislatura que está a piques de finalizar. “Queríamos demostrar que outro Concello era posible e, o que daquela era un desexo, hoxe é unha realidade”, indicaba. E completaba as súas palabras coa proxección dun vídeo (elaborado por Andrés Ortiz) que amosaba unha escolma dos proxectos realizados en diferentes puntos do municipio.
Seguidamente, Susana Fernández cedía a palabra a portavoz nacional do BNG, Ana Pontón, quen pedía o apoio “para que Secundino siga sendo o alcalde de Viana e que o sexa ademais cunha maioría reforzada para que este concello poida seguir avanzando”. Destacaba que o BNG “demostrou que se pode gobernar doutra maneira e que hai un proxecto para Viana”. Pontón lembraba ademais que o vindeiro 26 de maio haberá eleccións europeas, “é importante que teñamos alguén en Europa que vele polos intereses de Galiza”, dicía aludindo á cabeza de lista do BNG neses comicios, Ana Miranda.
O acto pechábase coa presentación da candidatura do BNG ás eleccións locais en Viana, na que Secundino Fernández ía nomeando un a un aos seus integrantes. “É unha candidatura sólida, paritaria, de xente moza con ganas e de xente con experiencia, con ideas e coa cabeza e o corazón en Viana do Bolo”, subliñaba.
Fotos: Carlos G. Hervella.
Candidatura do BNG en Viana do Bolo