Puntual a súa cita de todos os veráns, o día 10 de agosto, chegará a Mostra do Mel de Quiroga, que este ano celebra a súa XXXII edición.
Como cada ano este evento gastronómico dará a coñecer as calidades do mel que se produce na zona de Quiroga, a través da mostra de seis apicultores: Manuel Macía González (As Estradas), Mª Carmen Macía Fernández (Quiroga), Rubén Figueroa López (Toucedo), Caurelor (Quiroga), Ángel Gómez Martínez (Paradapiñol) e Manuel Rodríguez Fernández (Centeais). Mel de castiñeiro, de queiruga ou multiflorar, tres variedades con matices diferentes en canto a cor, textura e sabor pero coa mesma calidade será o que se poda atopar nesta mostra.
O recinto feiral para a venda de mel e outros produtos apícolas -como xelea real, pole ou própole- e produtos típicos da comarca, abrirase ás 11 horas na rúa Real, nas inmediacións da casa consistorial.
O grupo de gaitas local O Recanto encargarase de amenizar o recinto feiral e Movilla y los Irrepetibles co seu espectáculo de homenaxe aos clásicos da música mexicana e con versión de artistas españoles, animará a sesión vermú en torno ás 13 horas.
