A carreira deportiva do ciclista Sergio Calvo Bembibre (A Rúa, 2005) ten un futuro prometedor. Natural da Rúa Vella e xuvenil de segundo ano (o ano que vén pasa a Sub23), daba os seus primeiros pasos sendo un neno e en casa, Valdeorras. Empezou a destacar co Emico-Erbi Bembibre ata que fichaba polo Club Ciclista Rías Baixas no que estivo ata abril deste ano cando se incorporaba á estrutura ciclista júnior da Fundación Contador, como parte do Eolo Kometa Cycling Team, co que xa leva conseguido grandes metas como o Campionato Galego de Ruta, a Volta a Girona ou os subcampionatos de Chelle Campos e a Volta ao Barbanza, entre outros moitos.
¿Como chegas á Fundación Contador?
Empecei este ano no Rías Baixas pero cando viron o nivel que tiña nas competicións nacionais e que incluso ganei algunha internacional, contactaron comigo e co club para ver se me podían ceder e ao dicir que si, aquí estou. Nesta categoría xuvenil empeza a haber moitos olladores que foron os que se interesaron en min. Eu penseino un pouco porque tamén tiña outra ofertas pero decanteime polo Eolo porque ten unha gran estrutura e equipo, moito material e moita carreira e a verdade é que estou moi contento, penso que foi a mellor decisión que puden tomar. A ver como vai.
Ata agora ¿cal foi o teu mellor resultado?
Do que estás máis orgulloso. Eu diría que a etapa na Bizkaiko Itzulia no mes de xullo, unha carreira a nivel internacional. Estiven ata o último día no podio, no segundo posto, e ao final quedei sexto pero lévome a vitoria de etapa e unha gran experiencia. Foi sen dúbida a miña mellor vitoria, tanto por nivel como por eficiencia. En agosto no Díptico de Vigo ganei a cronoescalada e quedei segundo na de estrada. Puden levar tamén o Díptico así que non estivo mal. Uns resultados que demostran que estás en boa forma.
¿Como é o teu plan de adestramento?
Agora estou facendo entre 18 e 20 horas á semana, con adestramentos planificados polo meu preparador persoal e segundo a época do ano fago uns quilómetros determinados e uns adestramentos específicos e bloques de carga. Adestro en casa porque penso que tanto a Rúa como todo Valdeorras é o mellor sitio, ten superficie suficiente e terreo perfecto para adestrar porque ten de todo, chairo, subida, baixada. Por iso encántame esta zona.
¿Quenes son as túas referencias no ciclismo?
A min encántame o esloveno, ciclista profesional do Jumbo, Primož Roglič, pola súa capacidade de superación e ser capaz de recuperarse dun mal día. Neste momento é o meu referente. E a nivel español, por suposto Contador.
¿Que obxectivos te marcas neste deporte? ¿A que aspiras como ciclista?
A verdade, aínda que soe un pouco louco, a ganar unha gran volta. Un Giro, unha Vuelta,… pero sobre todo un Tour de Francia. Imos pelexar por iso a ver se podo cumprir ese soño. Plantexóuseme unha boa oportunidade, a ver se podemos aproveitala ben.
A entrevista íntegra pode lerse no número de setembro de O Sil Deportivo.
