Por segundo ano consecutivo, dentro da súa política de Responsabilidade Social Corporativa, o Clúster da Pizarra de Galicia decidiu premiar a excelencia nos estudos nas zonas do Barco de Valdeorras, A Rúa e Quiroga, áreas nas que se sitúan moitas das canteiras e empresas de lousa que integran a entidade que preside Víctor Cobo.
Así, na mañá deste luns 20 de xuño, o xerente do Clúster Severino González, facía entrega dun cheque de 300 euros a tres alumnos de tres centros educativos destas localidades, todos eles cunha media de 10. “É un modo de contribuír a recoñecer os méritos académicos dos nosos estudantes porque eles son o futuro e este premio simbólico quere axudarlles a comezar a dar forma a ese futuro”, sinalou Severino González durante a entrega de premios.
No IES Cosme López da Rúa, o premio recaeu no estudante de 2º de Bacharelato Pablo Sanz Álvarez. Á súa vez, no IES Lauro Olmo do Barco de Valdeorras, o premio foi para Claudia González García. Finalmente, no IES de Quiroga resultou merecedora do premio Icía Marcos García, cuxo cheque era recollido polos seus pais -Mariña e Victoriano- por atoparse ela de viaxe en Barcelona.
