Ata 69 doazóns por cada 1.000 habitantes. Esta é a taxa de doazóns que acadaba o municipio da Pobra de Trives no pasado ano 2017. Esta cifra supera as 40 doazóns por cada 1.000 habitantes que recomenda a Organización Mundial da Saúde e convérteo no concello ourensán con maior taxa de doazón e nun dos primeiros de Galicia. Así se lle recoñecía o 14 de xuño, coincidindo co Día Mundial do Doador de Sangue, nun acto que se celebraba na Cidade da Cultura de Santiago de Compostela.
Alí o alcalde da Pobra de Trives, Domingo Diéguez González, recollía a distinción da Axencia de Doazóns de Órganos e Sangue (Ados) ao Concello de A Pobra de Trives, por ser un dos municipios con maior taxa de doazóns de Galicia, xunto con Padrón, Meira, A Guarda, e Ordes. Entregáballa Marisa López García, directora de ADOS.
Tras a entrega de todos os recoñecementos, o presidente da Xunta de Galicia, Alberto Núñez Feijóo, clausuraba o acto, dando os parabéns a todos os disitinguidos e animando a toda a cidadanía a doar. Pola súa banda, o alcalde Domingo Diéguez trasmitiu as súas felicitacións “para toda a veciñanza de Trives por ese recoñecemento”.
Neste mesmo acto entregábanse recoñecementos ás empresas que fomentan a doazón entre os seus empregados (un total de trece, entre as que figuran o Grupo Coren e Faurecia Ourense), nas Forzas Armadas, nos centros de ensino universitario e non universitario (con centros como a Universidade de Vigo e o CIFP A Carballeira-Marcos Valcárcel), nas iniciativas innovadoras e nas campañas especiais de doazón e nas irmandades de doadores.
