Non foi a edición máis numerosa pero a Festa da Empanada de Costrelas celebraba o 20 aniversario co mellor ambiente prenavideño.
Apenas oito meses da anterior edición (celebrada en abril deste mesmo ano por non poder celebrarse no 2021, en plena pandemia) no mediodía deste sábado 17 de decembro celebrábase a XX edición da cita gastrómica organizada pola Asociación Sabugueiro, á que asistían unhas 200 persoas.
En torno ás 14 horas a carpa climatizada ubicada no campo de San Roque, na Rúa Vella, abria as portas para acoller aos comensais que degustaban un exquisito menú a base de sopas de allo ben quentiñas, empanada de costelas adobadas e torta de roxóns, á parte de viño, café e licores.
A música corría un ano máis a cargo de disco show Danzalia e entre todos os que mercaron rifas sorteábanse varias cestas con produtos doados por empresas colaboradoras.
Fotos e vídeo: Monica G. Bellver.
