O Entroido de Verín despedíuse por todo o alto cun xantar popular no que se recoñeceu o esforzo e a paixón das carrozas e comparsas participantes nos desfiles. Durante o evento, celebrado nun ambiente de festa e convivencia, entregáronse os tradicionais galardóns que distinguen a aqueles que contribúren a manter viva a esencia desta celebración tan emblemática.
A concelleira de Festexos, Cultura e Turismo, Samanta Barreira, foi a encargada de anunciar os premiados desta edición, destacando a súa traxectoria e dedicación ao Entroido de Verín:
- Premio Cigarrón de Honra: Concedido a Óscar Moredo, quen leva preto de dúas décadas mantendo viva a esencia do Entroido, participando activamente en todos os desfiles e facendo resoar as chocas con orgullo e tradición.
- Premio Fidelidade: Outorgado a José Manso, en recoñecemento aos seus 34 anos de dedicación ao Entroido, sorprendendo cada ano coa orixinalidade dos seus disfraces e carrozas, enchendo a festa de creatividade e humor.
- Premio Pescadilla (in memoriam): A título póstumo para José Luis Carrasco “Chelis”, quen dedicou a súa vida ao Entroido de Verín, converténdoo nun escenario de alegría inesgotable. O premio foi recollido pola súa viúva, María Jesús Cabido (Susi), e os seus fillos Rubén e Susi.
Os galardóns foron entregados polo tenente de alcalde, Diego Lourenzo, acompañado polos pregoeiros desta edición, Jorge, Pablo e Ramón Prieto, ademais de Luisina, viúva do “Pescadilla”.
