Cunha serie de actividades, organizadas a través do Centro de Información á Muller (CIM), Viana do Bolo conmemorará o “Día da Muller Rural”, cuxa data é o 15 de outubro. Presentábanse o 8 de outubro e nun acto que contaba coa presenza do alcalde de Viana, Secundino Fernández Fernández, do concelleiro de Servizos Sociais, Manuel Diéguez Alonso, e da directora e psicóloga do CIM, Sara Feijóo Primo.
O programa abrirase con música. Así o 14 de outubro ás 20h. na Casa da Cultura vianesa poderá asistirse ao concerto “Feminino Plural” de Silvia Penide e Clara López, que interpretarán cancións de diversas cantantes galegas, españolas e mesmo internacionais. Os actos continuarán o 15 de outubro con contacontos e o 18 deste mesmo mes cunha proxección documental, entre outras propostas.