A sétima andaina do Concello de Nogueira de Ramuín vaise desenvolver a favor dos afectados polo lume, baixo o lema “Todos contra o lume, o noso monte importa”.
A proba deportiva que terá lugar o vindeiro sábado, 2 de decembro. Os interesados en participar poden anotarse ata o mesmo día da proba, sendo 7 euros o prezo da inscrición. Ademais está aberta unha fila cero para todos aqueles que queiran colaborar coa causa. “A intención é dedicar o que consigamos a reforestar os nosos montes, concretamente a especies arbóreas comúns de Galicia que plantaremos no noso municipio e, se podemos, nos limítrofes”, explicou o tenente de alcalde de Nogueria de Ramuín, Raúl Soto, na presentación hoxe, 28 de novembro, deste evento deportivo na Deputación e que estivo acompañado do concelleiro de Seguridade Cidadá, Manuel Pereira.
A proba ofrece aos participantes dous posibles percorridos, unha ruta longa de 18 quilómetros e outra curta, de 10 quilómetros. A saída para ambas será o vindeiro sábado, as 10.00 horas desde a Praza do Afiador de Luíntra.
No acto de presentación tamén estivo o vicepresidente da Deputación, Rosendo Fernández, que destacou “a variada e dinámica actividade deportiva que presenta o Concello de Nogueira de Ramuín ao longo de todo o ano, como esta andaina que percorre as paraxes de maior beleza da contorna nesta época do ano”.
