Na tarde deste martes 16 de xullo unha muller sufría queimaduras por mor dun lume nunha leira a carón da súa vivenda en Carballeda de Avia, tal como informan dende o 112 Galiciam especificando que o lume rexistrouse a escasos metros da vivenda da implicada e estaba xa apagado cando chegaron os servizos de emerxencias.
Minutos antes das 15:30 horas, o persoal sanitario contactou co 112 Galicia e informou dos feitos, acontecidos no lugar de Fornelos, pertencente á parroquia de Abelenda das Penas. Segundo explicaban na súa comunicación, “a muller precisaba asistencia sanitaria ao sufrir queimaduras nos brazos e no rostro”. Pouco despois, os xestores do CIAE-112 Galicia puideron contactar coa propia implicada, que foi atendida e posteriormente trasladada en ambulancia polos profesionais sanitarios ao centro hospitalario de referencia.
No lugar estiveron Urxencias sanitarias de Galicia-061, o persoal do distrito forestal da zona, dependente da Consellería de Medio Rural, o GES de Ribadavia e os axentes da Garda Civil.