Vilariño de Conso e Viana do Bolo acollerán esta fin de semana, 28 e 29 de xaneiro, a III Mascarada Ibérica, na que 26 agrupacións de festas inverno, procedentes das catro provincias galegas, Cantabria, Asturias e do norte Portugal concentraranse nestas dúas vilas veciñas.
Tanto o alcalde de Viana do Bolo, Secundino Fernández, como os organizadores Carlos Veiga, da Asociación Xuntos Polo Follón de Vilariño de Conso, e Jorge Domínguez, da Comisión Entroido 2017 de Viana do Bolo, remarcaron que o obxectivo desta iniciativa é pór en valor a tradición do Entroido.
Os organizadores explicaron que esta cita xorde a partir do obxectivo de xuntar as celebracións do Entroido dos tres concellos veciños: Viana, Vilariño e Manzaneda. Carlos Veiga lembrou, na presentación de hoxe na Deputación, que “antes tiñamos que pedir nós que viñesen outros entroidos, agora solicitan eles vir á Mascarada”.
Hai que lembrar que a II Mascarada Ibérica recibiu, o pasado ano, o Premio Nacional de Tradiciones 2016 que outorga a Sociedade Española de Antropoloxía e Tradicións Populares.