A sede do Colexio Oficial de Enfermería de Ourense (COE Ourense) acollerá durante a mañá e a tarde do próximo xoves 25 de maio a xornada “A violencia na nosa sociedade a debate. Estamos nun mundo cada vez máis violento? Como previr a agresividade e a violencia”.
Este evento, organizado polo Instituto Superior de Formación Sanitaria (ISFOS), dependente do Consello Xeral de Enfermería, reunirá na cidade de Ourense a un grupo de expertos, dos ámbitos máis variados e con ampla experiencia, para analizar e debater sobre a violencia desde os seus campos profesionais. A través das conferencias e debates previstos no programa, abordarase a cuestión da violencia desde unha perspectiva transversal e multidisciplinar: falarase de violencia de xénero, de malos tratos á terceira idade e a menores de idade, de bullying nas aulas e en redes sociais, de trata de seres humanos, de prostitución, de agresións a persoas con discapacidade… prestando especial atención á violencia no ámbito sanitario e aos diversos tipos de agresións cara a profesionais da saúde.
A xornada diríxese ao público en xeral e a asistencia á mesma deberá confirmarse a través dun formulario, dispoñible na web do COE Ourense: enfermeriaourense.org (ata o 21 de maio inclusive) ou a través dos teléfonos 988228417 ou 618877011.
